Revelation of John 14
Ta Mitema Noxou Sipsip 'Olu Ilexenu Lexe Alavua
1Ioxe eni emaisou mimii ne mukalu xe emalei la, emaisou Sipsip 'Olu mutulu teitexi no alaele ne Sioni. Anu ilo'a ta mitema e mikaukavunu Sipsip 'Olu xe Momu Lataua ualasi'a no 'alaie'i. Ane'i ta mitema ne itiitisi'a mumomomo loxo 144,000. 2 aXe elomusou mii vile luluxu teitexi no loxotolo luluxu loxo lexa utaloxo no kisou matala mo loxo lele'e upau la luluxu. Mo eni elomusou mii ne luluxu loxo tamaxu susapu e ta mitema mipita xe mivau la mutatama. 3 bLa emaisi'a ta mitema itiitisi'a loxo 144,000 mitulu talaxa'a mulai no anu puloulou noxou Lataua mo noxi'a ta mimii tami'a e mimauli xe noxi'a ta tatila. Ane'i mitulu no talaxa'a ne la ilelexenu lexe vile alavua. Lexe ne ane'i ta mitema e Lataua mupamauline'i e itiitisi'a loxo 144,000 ane'isisi milavusou. 4Ane'i ta mitema ne misaxila'u maulixa'a la malemalenga mo i'oxonu masuane'i no anu 'ilixo sou ilai noxi'a ta sema uasi, mo ilavu sou 'ilixo ane ne uasisi manina. Mo ane'i imulimulinu Sipsip 'Olu utotomu mo lexe anu ulai a loxovaa la ane'i imulinusi. Xo ane'i Lataua mupamauline'i no taine'i ta mitema mo loxo xai iou vile temanu lingamo tei la anu Lataua mo Sipsip 'Olu na'a. 5Mo vaikala kalavoi vile ulaa no anaxa'a uasi, xo ixalisou susu vile no anu maulixa'a uasisi manina.Vaivaikala Noxi'a ta Angelo Tatalu
6Mo emalei la, la emaisou angelo vile muvava teitexi no nixi manina. Anu mune'e sou ua'aloxu a'alo laixe ane kaluxu uasi noxi'a ane'i ane mixolu no lia 'o no xalexalee tuatuala no lia 'o ukalusi mo matamata iouiou mo vaikalai'a iouiou xe ta mitema vasime'a kaukavuxu iouiou. 7Anu mu'ava tatila aloxo 'o, “Nga'ume noxou Lataua mo ngaitinu ualasou xo voxo noxou Lataua a muxali sou utulusi'a ta mitema no anu vaivaikala. La sou ngalotu noxou Lataua e Anu mukoinu loxotolo ilou lia mo luaki xe pupupulu sou lexa.”8 cIoxe angelo ta tameisou muvava mumulinu ane tei la mu'ava kalumo lexe, “Tuala tatila ne Vaviloni a mumamumamulo mukalu. Ani, anu mumamulo mukalu ne xo anu loxo sema sou vote'i e mi'oxone'i ta mitema no xalexaleenu tuatuala no lia 'o la mi'una no nano no anu 'ili'ilixo masumasua sou vote'i noxie. Anu aloxo ane milosi'a uaini pekia'u la ane'i miiexu.”
9 dIoxe angelo tatalusou muvava mumuline'i ta angelo ta tamei tei la mu'ava ta tatila aloxo 'o, “Lexe 'ena'ei ane mulotu noxou mii vova ne mo mulotu no anu mii e mipuinu iou loxo anu ne xe muno'u sosovo noxou muxolu no 'alaiou xe uasi la no avolu, 10 ela anu kalumo uiexu uaini noxou Lataua. Anu uaini noxou Lataua ne anu la'ia noxou e loxo uaini pekia'u e Anu munixi'u no anu paku ia mii vile u'unalaxu uasi. Itema ane ne, ne uela no navu mo taupea no ie'i ta angelo noxou Lataua mo no iou Sipsip 'Olu. 11 fLa navu e i'elaxa'a no anu ne mo uto'ito'isi'a ne umuxu ne ulai teitexi mo kaluxu uasi. 'Ena'ei ane ulotu noxou mii vova mo no anu mii e mipuinu iou loxo mii vova ne xe uno'u sosovo sou ualasou la uno'u uma'ila no anu navu ne no aso xe no 'olovoxo uasi. 12 gLexe mimii ne uxali la ta mitema noxou Lataua e imulinu lapuloto noxou mo imuxaxu tane'i noxou Iesu itulu pekia'a.”
13Ioxe angelo tatalusou ne muvivikala mukalu, la elomusou vaikala molu teitexi no loxotolo muvikala aloxo 'o, “Nakaukavunu vaikala ane 'o lexe, ‘Usoko vaimomo 'o, ane'i ane imuxaxu tane'i noxou Tila ia isoisoli la i'osa xo Lataua ualusi'a’ Angelo muvikala aloxo ne mukalu la Uleenu Tavuna muvikala kalumo aloxo 'o, ‘Ani manina ane'i ima'ila no anu xaixai ane ane'i mi'oxo'oxonu xo ane'i ino'u lakoli sou xaixai lailaixe ane ane'i mi'oxo'oxonu.’”
La'ilali no Lia 'o Lingamo sou Kokoli
14 hIoxe eni emaisou mimii ne mukalu, xe emalei la, la emaisou itema vile loxo itema 'olu muxolu no anu tamuxala kea ne anu mutaanu kisivalu mi'oxonu no anu xoulu, xe no avolu la mutetelisou laviso vile anaxu manina. 15Xe ieli mulai la emaisou angelo vile molu no nano no vimelu sou taasou noxou Lataua mulaa muatu la mu'ava ta tatila mulai noxou itema e muxolu no anu tamuxala aloxo 'o, “Nano'u lavisomeni mo nakokoli. Xo la'ilali no lia 'o anu lingamo mukalu xe anu voxo sou kokoli anu muxali.” 16La sou itema e muxolu no anu tamuxala ne mutangatulu mulu'e no lia xo la'ilali tavu'alo no lia 'o ne lingamo mukalusi la sou anu muvalitusou.17Mo ieli mulai la emaisou angelo vile la mulaa muatu no opo loxotolo. Anu muatu la mutetelisou laviso vile anaxu manina kalumo no avolu. 18 iXe emaisou angelo vile e musaxila'u valovalo sou navu no taasou Lataua muatu la mu'ava tatila mulai noxou angelo e mutetelisou laviso anaxu ne aloxo 'o, “Nano'u lavisomeni anaxu misevile ne mo navalitusou uaini kolekolesou no lia mo napitanu xo anu momoxo mukalu.” 19Angelo ne mulomusou vaivaikala ne mukalu la mutangatulu mulu'e no lia 'o sou muvalitusou uaini kolekolesou no lia mupitanu, mukalu la mulea mulai. Anu lavo'o alela sou umutanu uaini kolekolesou ne anu sosovo sou la'ia noxou Lataua manina ane. 20 jAnu muta'olunu uaini kolekolesou ne no lavo'o alela mukalu la ta mitema mimalamalaxo'u no tava'a sou lexaxu ulai uxali uaini. Ane'i mi'oxonu aloxo ne no ale no tuala tatila, la sialu munixi muatu no anu lavo'o alela ne la musiali mulai muxali loxo kilomita itemaxu mavulovexa mo itemaxu ta'uve (300 kilomita) xe kupaxu mutelo muxali no anu samalisou sou oosi anaxu. (Mita vile mo pa'usou).
Copyright information for
ATA